ازاي كأم توازني بين شغلك وبيتك واولادك
ازاي كأم توازني بين شغلك وبيتك واولادك كتير من الامهات بيقابلهم المشكلة دي وهي محاولة الموازنة بين مسؤوليات الشغل ومسؤوليات البيت
وقتها ممكن الضغوط تصيب الام مشاكل نفسية زي الاكتئاب والقلق
ولكن انهارده هتتعرفي على استراتيجيات تحسن من صحتك النفسية وتحقق التوازن بين الشغل وبيتك
ليه التوازن بين الامومة والشغل امر مهم ؟
رغم أن الأبحاث أثبتت أن الأمهات العاملات أكتر عرضة للقلق والاكتئاب مقارنة بالامهات ربات المنزل
إلا أنه لما الام بتنجح في إدارة حياتها المهنية ورعاية مسؤوليات بيتها بتتطور قدرتها على المرونة والتكيف والصفات دي بتفيد الام وتخلق بيئة ايجابية للطفل وهيتعلم منها الاتقان وتحمل المسؤولية.
ليه التوازن بين شغلك وبيتك بدون ضغوط مهم ؟
عشان تستمتعي بصحة جسدية ونفسية أفضل
الافراط في العمل لوقت طويل بيأثر على صحتك النفسية والجسدية، خاصة لو كان شغلك مطلوب منك السهر لوقت طويل وقتها بتكوني عرضة لامراض القلب ومشاكل النوم والاكتئاب وضعف الذاكرة
عشان كده التوازن بيحميكي من المشاكل الصحية ويضمنلك يكون عندك الطاقة اللازمة لكل مهماتك في اليوم
المساعدة على الحفاظ على حضور عقلك
لو حسيتي ان دايما وقت الشغل عقلك بيفكر في رعاية طفلك او قلقانة من الحاجات المطلوب تعمليها في البيت اثناء اجتماع، وقتها ممكن يكون فعلا في خلل في التوازن بين شغلك وحياتك الشخصية
ولكن لما بتحققي التوازن الصحيح بين الاتنين بتتمكني من التركيز على اللحظة الحالية
نصايح لتحقيق التوازن بين الأمومة والعمل
اهتمي بنفسك أولاً
قبل ما تدعمي غيرك اعتني بنفسك في البداية
بمعنى ان يكون عندك فترة راحة يومية بدون تفكير فشئ مع مشروبك المفضل، وفترات راحة مناسبة، وانك تهتمي بأكلك يكون صحي، وتنامي عدد ساعات كافي من الطرق المهمة للرعاية الذاتية ومتنسيش ان اهتمامك بنفسك عمره ما كان انانية
حافظي على الروتين
من اكتر الحاجات الي ممكن تساعدك على التوازن هو الروتين لانه بيساعدك تكوني منظمة اكتر ومش مشتته بين كذا حاجه في بالك طول اليوم
وده هيساعد اطفالك انهم يحسوا بالامان اكتر والراحه
حددي جدول للحاجات المطلوب منك تعمليها في بداية اليوم وجهزي وقت مخصص تقضيه مع اسرتك واطفالك ووقتك الشخصي وحاولي تلتزمي بيه قدر الامكان
كوني مرنة
حياتك كل يوم بيحصل فيها احداث مختلفة غير متوقعة سواء في البيت او الشغل وبتكون ااطريقة الوحيدة لمكافحة ده هي الاستعداد للغير متوقع عشان كده دايما خليكي مرنة وعدلي خططك وقت اللزوم
حافظي على الفصل بين العمل والمنزل
حاولي دايما انك بعد الشغل تفصلي بين مشاكلك فيه وامور البيت
يمعنى انك متفضليش طول الوقت في البيت متضايقة بسبب مشاكل الشغل او تكوني في الشغل مهمومة دايما بسبب مشاكل البيت وتفضلي تفكري في اطفالك
عشان كده لازم تحافظي على الفصل بين الشغل البيت
خصصي وقت للأنشطة العائلية
استغلي دايما اوقات فراغك والاجازات في النشطة العائلية عشان تخلقي بيئة صحية لاولادك عشان صحتهم النفسية متقلش اهمية عن صحتهم الجسدية
اطلبي المساعدة
احيانا بتحسي ان عشان تكوني ام كويسة ان ميمفعش تطلبي من حد يساعدك لكن الحقيقة هي ان مفيش حد بيحقق التوازن الصحي بين الشغل وحياته لوحده، فمتترديش في طلب المساعدة ابدا
اقري عن : ازاي تحتوي طفلك العصبي
