تربية الطفل على طاعة الوالدين

تربية الطفل على طاعة الوالدين كأنها البذور اللي بتزرعيها بطفلك من صغره وتحصديها في شبابه

طاعة الوالدين مش حاجه بتيجي في يوم وليلة لانك لازم تحاولي باستمرار أنك تقومي سلوك طفلك كمان لازم طفلك يفهم وانت بتربيه على بر الوالدين أن الغرض مش التحكم وان الغرض الأساسي هو انك تقومي سلوكه وأن الامر ملوش علاقه بالحب او الكره 

وعشان كده لازم تتابعي طفلك باستمرار وتتاكدي ان طاعته ليكي ولوالده مش خوف منكم او من العقاب ولكن ده اختياره بكل حب.

وعشان تزرعي في طفلك طاعة الوالدين بتحتاجي مجموعة من الأساليب التربوية اللي هنوضحها في المقال ده.

طرق تربية الطفل على بر الوالدين :

تربية الطفل على بر الوالدين مش بالشدة والحزم طول الوقت لان الطريقه دي بتخلي طفلك مطيع ولكن مع الوقت ممكن تضعف ثقته بنفسه او تخليه عنيد اكتر لانه هيبقى عايز يفرض شخصيته بأي شكل عشان كده لازم توازني في طريقتك في تربية طفلك بالاساليب التربوية زي:

تعلمي طفلك ازاي يسمع كلامك:

بمعنى انك لما ترفضي سلوك لطفلك ما ترفضيش بشكل قاطع بدون مناقشة ولكن ناقشيه ليه اللي هو بيعمله ده غلط وليه ما ينفعش او ليه الموقف مش مناسب لأن النهي عن السلوك بدون فهم هيخلي طفلك ينفذ اللي قلتي عليه لا بمجرد انك ما تكونيش قدامه.

زي مثلا : لما طفلك يقرب من الكهرباء تحذيره بالتخويف والزعيق بس مش هيخليه يوقف السلوك ولكن لازم تشرحيله ان الكهربا خطر.

ادعمي سلوكيات طفلك بكلام ايجابي :

تربية الطفل على طاعة الوالدين بتحتاج دعم منك بشكل مستمر وانه يحس انه مقبول ومحبوب عشان يسمع الكلام برغبه منه مش باجبار.

مثلا : لما طفلك مينجحش في امتحان صعب في الموقف ده لازم تحسسيه بالحب والتقبل بالرغم من عدم نجاحه وتتناقشي معاه في أسباب عدم النجاح لان احساسه بالامان و انك بتحسسيه بحبك دايما هيكون هو داعم اكبر انه يسمع كلامك ويحسسك بالحب من ناحيته ويلتزم اكتر.

واتجنبي دايما التقليل من انجازات طفلك لان تصرف ده بيخليه عنيد اكتر ويرفض الاوامر وهيزود من رغبه طفلك انه يدور على الدعم من بره الاسره. 

الحوار والمناقشة :

تربية الطفل على طاعة الوالدين بتحتاج لحوار مستمر ومناقشة وعشان تفهمي افكار طفلك عن طريق لازم تديه مساحه تعبير عن رأيه بشكل كافي وعشان تحسني من تواصلك مع طفلك لازم تتبعي الخطوات دي :

اختيار وقت للتواصل مع طفلك :

حتى لو كان طفلك صغير في السن لازم يكون في وقت معين بيجمعكم يحكيلك فيه مشاكله فممكن تحددي وقت بعد الرجوع من المدرسة بانك تعرفي ايه الاحداث اللي حصلت كل يوم بشكل سريع وتحددي وقت في الإجازة الأسبوعية وانكم تتشاركوا مشروب او وجبه بتحبوها سوا وتبدأي تساليه اسئله زي ايه اخر موضوع فكرت فيه مده طويله او ايه اخر سؤال في دماغه مكنش عارف اجابته وده هيساعدك تعرفي اكثر الي بيدور في دماغ طفلك كمان وهيساعده على انه يقرب منك اكتر.

علميه ازاي يكون مستمع جيد : 

تربية الطفل على طاعة الوالدين بتحتاج انك تبداي بنفسك في الاول عشان طفلك يتعلم انه يسمع غيره لازم تسمعيه انتي في البدايه بأنك تسمحي له انه يخلص كلامه ويعرضلك مشكلته او رايه عشان تبداي تردي عليه ده هيخليه يلتزم بنفس الاسلوب وقت ما انتي تناقشيه بدل من طريقه الهجوم او مقاطعة الكلام عشان كل فرد يفرض رايه.

عدم تشجيع الطفل على الرفض :

تربية الطفل على طاعة الوالدين بتحتاج انك تعرفي طاقة طفلك فمثلا انت عارفه امتى بيكون طفلك مستعد ينفذ لك طلباتك وامتى ما يقدرش وقت ما يكون مشغول بشيء معين او انه يكون تعبان لانك وقتها كده بتدي له دافع انه يرفض طلبك لانه هيحس انه فوق امكانياته وهيدي له شعور انك بتستغليه اكثر من انه طلب عادي

نهي طفلك عن السلوك السيئ :

لما يظهر سلوك سيء لطفلك زي انه يعلي صوته او يتكلم بطريقه غير مناسبه في اسلوب النقاش في الأسرة فكري طفلك وقتها ان ده مش اسلوب المعتاد وان الطريقه دي غير مقبولة لان لو تغاضيتي مرة عن السلوك طفلك هيظن ان الطريقه دي عاديه ومناسبه للمناقشه حتى لو كانت غلط. 

حدد المشكلة ولا تنتقد الطفل :

تربية طفلك على بر الوالدين بتحتاج انه يكون انتقادك للسلوك الغلط مش انك تنتقدي طفلك نفسه لأن ده هيساعدك وهيساعد طفلك على التركيز على حل المشكلة نفسها لكن انتقاد الطفل بشكل مستمر بيحسسه ان المشكله شخصيه وان المقصود هو ان محدش مهتم بيه ولا لرغبته.

انصح طفلك بطريقة لطيفة :

لما يتصرف طفلك بطريقة غير مقبوله حتى لو كان وسط ناس وقتها خدي طفلك بعيد عن مكان التجمع واتناقشي معاه بشكل سريع وعرفيه ان التصرف ده غير مقبول ولو كان طفلك أخطأ بالفعل عرفيه انه لازم يعتذر للشخص اللي كلمه بطريقه مش مناسبه ولكن ما تنصحيهوش بشكل علني خاصة لو طفلك عنيد.  

تربية طفلك على بر الوالدين مش حاجه سهله وشئ بيحتاج منك صبر وتحمل وعشان كده خليك حريص على تحسين سلوك طفلك بطريقه صح تحافظ على كرامته وتحسسه انه محبوب لان الطريقة دي هتخليه منه لنفسه حابب انه ينفذ لك كل طلباتك.

اقري عن :العند في المراهقة: نصائح للتعامل مع عناد الأبناء المراهقين