طرق التعبير عن المشاعر للاطفال بشكل صحي
طرق التعبير عن المشاعر للاطفال بشكل صحي
لو معلمتيش طفلك ازاي يعبر عن مشاعره هتكوني انتي السبب فأنك تبني حاجز بينكم طول العمر!
التعبير عن المشاعر للاطفال بشكل صحي مهارة أساسية بيحتاج كل طفل انه يتعلمها من سن صغير
لأنها مش بس هتحسن علاقتك بيه لكن هتخلي عنده قدرة اكبر على التعامل مع المواقف الصعبة ويعرف ازاي يفهم مشاعره أو يعبر عنها بالكلام بدل من العنف
اعرفي ازاي تعلمي طفلك يعبر عن مشاعره وتبني بينكم علاقة صحية بدون حواجز من خلال المقال ده
1. ساعدي طفلك يتعرف على مشاعره
تسمية المشاعر:
الخطوة الأولى في تعليم الطفل التعبير عن مشاعره هي مساعدته على التعرف عليها وتسميتها. لان لما طفلك يتعلم الطفل أسماء المشاعر زي : “حزين”، “سعيد”، “غاضب”، أو “خائف”، هيكون عنده الأدوات اللغوية الي بيحتاجها للتعبير عن نفسه.
استخدام الأمثلة اليومية:
اربطي المشاعر بالأحداث اللي بيمر بيها الطفل، مثلًا: لو كسر لعبته المفضلة، قولي له: “أنت حزين لأن لعبتك اتكسرت؟”.
خطوة عملية:
استخدمي الكروت او القصص المصورة اللي بيكون فيها تركيز على تعابير الوجه عن المشاعر واطلبي من طفلك وصف الصورة أو اختيار المشاعر الي حاسس بيها دلوقتي.
2. شجعي تعبير الطفل عن مشاعره بالكلمات
التحدث عن المشاعر:
الأطفال بيحتاجوا للتشجيع على استخدام الكلمات بدل من السلوك للتعبير عن مشاعرهم، اسأليه عن شعوره بطريقة لطيفة، واسمحيله بوقت كافي للتعبير.
كوني قدوة:
عبري عن مشاعرك قدام طفلك بطريقة صحية، قولي له مثلًا: “أنا متضايقة لأن اليوم كان مرهق، لكن سعيدة إننا هنقضي وقت مع بعض”.
خطوة عملية:
خلي عادة يومية في البيت أن كل فرد يسأل التاني “ازاي كان يومك انهارده؟” عشان يكون في كل يوم مساحة لتفريغ المشاعر.
3. ساعديه في فهم أن المشاعر طبيعية
تجنبي إنكار المشاعر:
متقوليش لطفلك عبارات مثل “ما فيش حاجة تخوف” أو “ما تبكيش”، بدل الطريقة دي اعترفي بمشاعره ووضحي له أن من الطبيعي أن يحس بالخوف أو الحزن.
تعزيز القبول:
علمي طفلك أن كل المشاعر مقبولة، لكن طريقة التعبير عنها هي الأهم، لانها هي الي هتخلي الشخص الي قدامه يفهمه اكتر عشان يعرف يحتويه.
خطوة عملية:
لما يحس طفلك بالغضب، قولي له: “الغضب شعور طبيعي، لكن لازم نتكلم عنه بدل ما نكسر حاجة”.
4. استخدمي الألعاب والأنشطة للتعبير عن المشاعر
اللعب الإبداعي:
الأنشطة زي الرسم، التلوين، أو التمثيل بتدي طفلك فرصة للتعبير عن مشاعره منغير استخدام الكلمات وبتفرغ طاقته السلبية في شئ مفيد.
الألعاب الدرامية:
استخدمي الدُمى أو شخصيات كرتونية عشان تساعدي طفلك على إعادة تمثيل المواقف اللي مر بيها ويعبر عن مشاعره خلالها.
خطوة عملية:
شاركي طفلك وسيبيله أوراق وألوان، واطلبي منه أن يرسم شعوره انهارده، وبعدين اتكلمي معاه عن الرسم.
5. علميه كيفية التعامل مع المشاعر السلبية
إدارة الغضب:
اشرحي لطفلك طرق صحية للتعامل مع الغضب، زي التنفس بعمق أو العدّ حتى 10، او انه يبعد عن المكان الي فيه المشكلة لحد لما يهدى، او يعمل اي نشاط بلعبة زي لعبة نفخ الصابون او غيرها.
التعامل مع الحزن:
لما يحس بالحزن، قدمي له الدعم بالكلمات أو الحضن، وبيني له تعاطفك وقولي: “أنا هنا لو عايز تتكلم”.
مواجهة الخوف:
ساعدي طفلك على مواجهة مخاوفه بالتدريج، وخليكي جنبه عشان تطمنيه.
خطوة عملية:
لما يغضب طفلك، اقترحي عليه نشاط يهديه ويشتت تركيزه عن المشكلة زي: الرسم أو اللعب بالمكعبات، بدل من التصرف العدواني.
6. تعزيز التواصل غير اللفظي
لغة الجسد:
علّمي طفلك ملاحظة لغة جسده وجسد الآخرين عشان يتعرف على المشاعر. مثلًا: قولي له: “لو شفنا حد مكشر، ممكن يكون متضايق”.
الإيماءات:
بيني له طرق للتعبير عن المشاعر بالإيماءات، زي : فتح الذراعين عندما يشعر بالسعادة.
خطوة عملية:
العبوا لعبة “تخمين المشاعر” زي انك تمثلي مشاعر مختلفة بوجهك أو حركاتك، ويخمنها طفلك.
7. قدمي له الدعم المستمر
الاحتواء:
اتأكدي دايما من أن طفلك بيحس أنك جنبه وانك فهماه، وقدمي له الدعم لما يواجه مشاعر صعبة، بأنك تحضنيه وتتكلمي معاه لوقت كافي.
التشجيع:
امدحي طفلك لما يعبر عن مشاعره بطريقة صحيحة، ووضحي له أنه على انه اتصرف بطريقة كويسة وصح وانك فخورة بيه.
خطوة عملية:
لما يعبر طفلك عن مشاعره بالكلمات بدلاً من الصراخ أو السلوك العدواني، قولي له: “أنت شاطر لأنك حكيت لي اللي حاسس بيه”.
تعبير الطفل عن مشاعره بشكل صحي هو استثمار في مستقبله النفسي والاجتماعي، وممكن يستهلك منك مجهود لكن نتايجه هتظهر في شخصية الطفل الواثقة وقدرته على بناء علاقات صحية مع اللي حواليه. وخليكي حريصة دايما على أنك تكوني قدوة لطفلك، ووفري له بيئة كلها حب وتفاهم عشان يحس بالامان لما يعبر عن نفسه.
اقري عن : تحمل المسؤولية عند الاطفال
