علاج الكذب عند الاطفال خطوة مينفعش يتأجل حلها في اول مره طفلك يكدب فيها ولازم تعالجها بشكل فوري
لان من أسس التربية هو تعليم الطفل ازاي يتعامل مع المشاكل بدون كذب او اخفاء الحقيقة.
في المقال ده هتتعلمي ازاي حسب عمر طفلك تتعاملي مع مشكلة الكذب بشكل مبكر
علاج الكذب عند الاطفال من عمر 2-4 سنوات :
في العمر ده بيكون طفلك لسه مش بيقدر يفرق بين الكدب والحقيقة بشكل صحيح ولا يفرق بين الخيال والحقيقة.
- مثلا لو قال طفلك ان حد اخد لعبته ( مش حقيقي )
- متقوليش انت بتكذب وانت الي ضيعتها.
- لكن بعد ما تتأكدي ان محدش اخد لعبته تقوليله وتوضحي ازاي اللعبة مش موجودة بأن محدش اخدها وانه ضيعها او نسيها في مكان
- وبعد وصول طفلك لسن 4 سنين ابدأي وضحي لطفلك ان الي بيقوله مش حقيقي وابدأي وضحي ان السلوك ده حرام بطريقة تناسب سنه
علاج الكذب عند الاطفال من عمر 5-8 سنوات:
في السن ده هيكون طفلك فهم الكذب ومعناه وممكن بستعمله مره او اكتر عشان يختبر ذكائه ف انه يداري اي شئ عنك وهيجرب فالامور الخاصة بالمدرسة والواجب.
- وقتها بتبدأي توضحي ان حل المشكلة مش الكذب وانه يداري.
- وان المشكلة الاكبر ان ده هيسببله مشاكل زي انه هيأثر على مستواه الدراسي وغيرها من المشاكل وبدون انفعال مع توضيح التصرف الخاطئ وما هو البديل الصحيح.
علاج الكذب عند الاطفال من عمر 9-12 سنوات :
في المرحلة دي بيبدأ الطفل يحدد هويته وقيمته من المنظومة الاخلاقية الي بتزرعيها جواه.
وفي العمر ده بيكون قادر يتقن الكدب بشكل اكبر ويظهر مشاعر تأنيب الضمير بعد الكذب.
- وحاولي باستمرار بأنك تشرحي لطفلك السلوكيات الصحيحة عن طريق القصص الي بتتكلم عن الاخلاق زي الصدق والامانة.
- وقربك من طفلك في السن ده مهم لانه بيحسسه بالامان خصوصا لما يبدأ مرحلة المراهقة.
- لان لو علاقتكم فيها هدوء وصراحه هتكون هي الواقي الاساسي ضد الكدب.
- فوقتها ممكن يصارحك ان درجات الامتحان مكنتش كويسة او انه صحابه بيشربوا سجاير منغير ما يخاف من ردة فعلك لانه عارف انك هتستقبلي كلامه بهدوء بدون تعنيف وهتنصحيه ازاي يتعامل مع المواقف دي صح وبكده تكوني اسستي انسان حقيقي وصادق.
اقري عن : ازاي تتعاملي مع نوبات غضب طفلك
