7 اخطاء شائعة في تربية الطفل بتقع فيها الأمهات (وازاي تتجنبيها)
7 اخطاء شائعة في تربية الطفل بتقع فيها الأمهات (وازاي تتجنبيها)
لو بتلومي نفسك على كل حاجه بتعمليها غلط غصب عنك في تربية طفلك تبقي بتدمري نفسك
لأن التربية حاجه ملهاش كتالوج تعرفي منه كل تفصيلة فهيكون طبيعي إنك تغلطي في أوقات كتير.
والغلط ده مش معناه إنك أم مش شاطرة، بالعكس، هو جزء من تعليمك ازاي تكوني أم.
في المقال ده هنناقش ايه هي الأخطاء الشائعة اللي بتقع فيها الأمهات بالتفصيل، مع نصايح عملية تساعدك تتجنبيها.
1. محاولة الوصول للكمال في كل شيء
كتير من الأمهات الجدد بيحسوا إنهم لازم يعملوا كل حاجة صح وبمنتهى الكمال، سواء في التربية، تنظيم البيت، تغذية الطفل، أو حتى شكله ونظافته، ده بيخلق ضغط نفسي رهيب وبيخلي الأم تحس بالفشل لو أي حاجة ما اتعملتش بالطريقة المثالية.
ازاي تتجنبي ده؟
اعرفي إن الكمال مستحيل، حتى في التربية والأهم هو إنك تعملي اللي تقدري عليه.
ركزي على الأولويات زي تغذية الطفل وحمايته ورعايته النفسية، وسيبي الأمور الأقل أهمية لوقت لاحق.
خدي فترات راحة لنفسك وما تضغطيش على أعصابك.
2. القلق المبالغ فيه على صحة الطفل
أي حركة غريبة أو صوت من الطفل ممكن يثير قلق الأم، خاصة في الشهور الأولى ده بيخلي الأم تعيش في حالة خوف مستمر وبتفضل تسأل عن كل تفصيلة صغيرة وده ممكن يخليكي في حالة توتر زيادة عن اللزوم وتأثر على نومك وسلوكك اليومي.
ازاي تتجنبي ده؟
اقري اكتر عن الأعراض الطبيعية اللي بيمر بيها الأطفال الرضع زي المغص أو الارتجاع، عشان ما تقلقيش من الحاجات العادية.
حافظي على التواصل المستمر مع دكتور الأطفال، لكن ما تخلطيش بين القلق الطبيعي والإفراط فيه.
افتكري إن الأطفال مرنين أكتر مما بتتخيلي، وغالبًا المشاكل اللي بتقلقي منها بتكون بسيطة.
3. الإفراط في سماع نصائح الآخرين
كل حد حواليكي من الأهل للأصدقاء وحتى الجيران، هيبقى عنده رأي عن طريقة التربية الي بتربيها لطفلك، وكتير من النصايح بتبقى متضاربة، وده ممكن يخليك تحسي بالتشتت وعدم الثقة في نفسك.
ازاي تتجنبي ده؟
اختاري مصادر موثوقة للنصيحة والتربية، زي طبيب الأطفال أو كتب التربية المعروفة.
ثقي في إحساسك كأم، لأنك أكتر واحدة فاهمة احتياجات طفلك.
ما تخافيش تقولي “لأ” لو حسيتِ إن النصيحة مش مناسبة ليكي أو لطفلك
4. نسيان الاهتمام بنفسك
الاهتمام بالطفل بياخد كل وقتك ومجهودك، لدرجة إنك ممكن تنسي تاكلي، تستريحي، أو حتى تهتمي بصحتك النفسية، مع الوقت، ده بيأثر سلبًا على طاقتك وقدرتك على رعاية طفلك.
ازاي تتجنبي ده؟
خصصي وقت يوميًا لنفسك مهما كان قصير، حتى لو مجرد 10 دقايق تقضيهم في هدوء أو تعملي حاجة بتحبيها.
اطبخي وجبات سريعة وصحية ليكي، لأن صحتك الجسدية هتأثر على قدرتك على رعاية طفلك.
ما تخجليش تطلبي مساعدة من شريكك أو حد من أهلك.
5. مقارنة طفلك بالأطفال التانيين
كتير من الأمهات بيبدأوا يقارنوا تطور طفلهم بأطفال تانيين، سواء في الكلام، المشي، أو حتى الوزن، وده ممكن يخليكي تحسي بالقلق أو الإحباط لو حسيتِ إن طفلك “متأخر” مقارنة بغيره.
ازاي تتجنبي ده؟
افتكري إن كل طفل له وتيرته الخاصة في النمو وان دايما في فروق بين الاطفال وبتبقى ملهاش علاقة بيه او بذكائه.
ركزي على إنك تحفزي طفلك بدل ما تقارنيه بغيره.
لو عندك شك في أي حاجة، استشيري الطبيب بدل ما تقلقي من غير داعي.
6. الاعتماد على نفسك في كل حاجة
كتير من الأمهات بيحسوا إنهم لازم يشيلوا كل المسؤوليات لوحدهم، سواء في رعاية الطفل، إدارة البيت، أو حتى تلبية احتياجات الشريك. ده بيخلق ضغط نفسي وجسدي كبير وبيخلي الأم تنهار بسرعة.
ازاي تتجنبي ده؟
اطلبى المساعدة من زوجك أو عيلتك مش عيب إنك تطلبي مساعدة في شغل البيت أو حتى ان حد يقعد مع طفلك فترة.
استعيني بتطبيقات أو خدمات بسيطة توفرلك وقت ومجهود.
افهمي إنك مش مضطرة تعملي كل حاجة بنفسك، لأن العناية بنفسك جزء مهم من العناية بطفلك.
7. الاستسلام لضغط وسائل التواصل الاجتماعي
صور الأمهات “المثالية” على إنستجرام وفيسبوك بتخلق شعور إنك مش بتعملي كفاية أو إنك أقل منهم، ده بيأثر على ثقتك بنفسك وبيخليك تضغطي على نفسك أكتر عشان توصلي للصورة “المثالية”.
ازاي تتجنبي ده؟
خدي استراحة من وسائل التواصل الاجتماعي لو حسيتِ إنها بتأثر عليكِ سلبيًا.
ركزي على حياتك وتجربتك الشخصية، لأن كل أم مختلفة.
اعرفي إن الصور دي غالبًا مش بتمثل الحقيقة كاملة، ووراها مجهود كبير أو لحظات مش مثالية محدش بيعرضها.
الأخطاء في التربية جزء طبيعي من رحلة الأمومة، ومفيش حاجة اسمها أم مثالية. كل تجربة فريدة، وكل يوم بتتعلمي فيه حاجة جديدة. الأهم إنك تعتني بنفسك، تستمتعي باللحظات الحلوة، وما تضغطيش على نفسك بسبب الغلطات. تذكري دايمًا إن طفلك محتاجك سعيدة ومرتاحة أكتر من أي حاجة تانية
اقري عن : العند في المراهقة: نصائح للتعامل مع عناد الأبناء المراهقين
