ما هي خطورة استخدام اسلوب المقارنة في تربية طفلك؟
ما هي خطورة استخدام اسلوب المقارنة في تربية طفلك؟
بعض الأمهات بتلجأ لأسلوب المقارنة بين اولادها عشان تحفزهم على النجاح او الالتزام بالسلوكيات، ولكن ده ممكن يتسبب في العكس لان المقارنة ممكن تؤدي لتحفيز الغيرة والرغبة في الانتقام من الطفل الي بيتقارن بيه لانه بيحس انه مش محبوب دايما.
واستخدام اسلوب المقارنة في تربية طفلك سواء بين الاخوات او القرايب فهي خطأ كبير بيقع في بعض اولياء الامور وهما مش مدركين خطورة المقارنة وتأثيرها على صحة طفلهم النفسية فالطفل دايما محتاج جرعات من الامان والتشجيع والتقدير والعطف وان دايما تديله فرصة يجرب حتى لو كانت النتيجة مش كبيرة
ليه المقارنة في تربية طفلك غلط ؟
ربنا خلق كل البشر مختلفين عن بعض وكل انسان له صفاته وطباعه الي بيتميز بيها حتى عن اخواته وعشان كده المقارنة السلبية ممكن تؤدي الي
1. تنافس سلبي بين الأخوات:
استخدام اسلوب المقارنة لتربية طفلك سواء في الشكل او الذكاء او السلوكيات ده بيخلي تركيز الطفل على انه يبقى افضل من اخوه بدل ما يركز على انه يكون شخص ناجح بس ووقتها ممكن يبدأ يتعامل بعدوانية مع اخوه الي بيتم المقارنة بيه لانه حاسس انه واخد مكانه عند الاب والام.
2. ضعف العلاقة بين الطفل وأهله:
الطفل الي بيتقارن دايما مع اخواته بيحس انه مش كفاية وده بيخليه يبعد عن اهله ويحس انه منبوذ ومهما عمل مش هيكون كفاية وده بيضعف ثقة الطفل بنفسه وبيكون مُصر اكتر على السلوك الغلط لانه كده كده حاسس انه مش محبوب.
3. ضياع الموهبة:
لو طفلك موهوب في شئ معين واستخدمتي المقارنة في تربية طفلك سواء بطفل مستواه اعلى في الموهبة او بموهبة حد تاني من وجهة نظرك افضل وقتها طفلك مش هيحاول انه يجتهد في انه يطور من نفسه عشان بيبدأ يركز على ضعف امكانياته اكتر من انه يشوف مميزاته.
4. مشاكل اجتماعية:
الطفل الي بيتعرض للتوبيخ واللوم بشكل مستمر وبيتقارن طول الوقت هيبدأ يتجنب انه يتفاعل اكتر مع الناس لانه هيحس انه دايما مش كفئ كفاية
5. شعور بالنقص:
تقدير الطفل لذاته بينتهي وقت ما يحس ان قيمته قليلة وده بيخليه عرضة اكتر انه يقبل ان الناس تعامله بطريقة اقل من الي يستحقها.
6. إرهاق نفسي:
استخدام اسلوب المقارنة بين طفل بيحط طفلك تحت ضغط دايما ومع الوقت ممكن تصيب طفلك باضطرابات زي القلق والخوف المرضي لأنه دايما تحت ضغط عشان يرضي اهله.
7. قتل الطموح:
المقارنة في تربية طفلك بتخلي الطفل يحس ان مفيش فايدة في اي مجهود بيعمله وان قدراته محدودة وده بيخليه يحس ان مهما عمل مش هيكون في مستوى غيره.
امتى تكون المقارنة إيجابية؟
استخدام اسلوب المقارنة في تربية طفلك مش دايما حاجه سليية لو استخدمها بحكمة منغير ما تجرح مشاعر طفلك وتبقى حافز ايجابي يخليه حابب انه يطور من نفسه زي :
انك تفكري طفلك دايما بانجازاته قبل ما تتكلمي عن غيره.
وتركزي دايما على نقط القوة ومواهبه وقدراته مش الضعف.
امدحي دايما مجهوده بغض النظر عن النتايج حتى لو مكنتش مثالية.
إزاي تشجعي اولادك بطريقة صحيحة؟
بدل ما تقارني طفلك بغيره ساعديه انه يطور من نفسه بانك توفريله بيئة تساعده نفسيا وجسديا على التطوير زي :
اتفقوا على روتين يومي:
الروتين اليومي بيخلي طفلك منظم اكتر وبيديله فرصة يمارس هوايته او رياضته المفضلة كل يوم او بشكل منتظم والطريقة دي هي اول خطوة للتطور.
علميه يعتمد على نفسه :
لما طفلك يعتمد على نفسه في حاجات حتى لو بسيطة زي انه يرتب اوضته او يلبس لوحده ده بيديله نظرة ايجابية عن نفسه وعن قدراته.
قدري مجهوده:
دايما حسسي طفلك بان سلوكيانه الايجابية ليها قيمة عالية اوي وفكريه دايما بعد كل سلوك ايجابي بانه هيفرق معاه في ايه.
مكافآت بسيطة:
خلي دايما في مكافآت لطفلك على سلوكياته وانجازاته ومش شرط انها تكون مادية دايما ممكن تكون المكافأه معنى وهي انك تديله فرصة يعمل حاجه جديدة عشان يحس ان مجهوده متقدر.
وخليكي فاكره دايما ان مش من العدل إنك تستخدمي المقارنة في تربية طفلك، لأن كل طفل عنده قدراته وشخصيته وظروفه المختلفة. بدل ما نقارنهم بالآخرين، نقارنهم بنفسهم ونشجعهم على التطور الإيجابي. الطريقة دي هتساعدهم يثقوا في نفسهم، ويكتسبوا مهارات جديدة، ويحسوا بالحب والتقدير.
اقري عن :ازاي اعلم طفلي الأعتماد على النفس
