8 نصائح للتعامل مع ابنك في فترة الامتحانات
8 نصائح للتعامل مع ابنك في فترة الامتحانات
فترة الامتحانات من أكتر الفترات اللي بيكون فيها ضغط على الأم والطفل.
علشان كده التنظيم الصح لليوم هو المفتاح لتقليل التوتر وتحقيق أفضل النتائج.
في المقال ده، هنوضح خطوات ونصائح عملية هتساعدك تنظمي يوم طفلك بشكل يضمن المذاكرة الفعالة والراحة النفسية.
ما الذي يزيد تركيز الطفل؟
وجبة فطار متوازنة:
لازم طفلك يبدأ يومه بوجبة فطار غنية بالطاقة والمغذيات، زي البيض، الجبن، الفواكه، وشوية مكسرات، لأن الأكل الصحي بيساعد في تحسين التركيز وتقوية الذاكرة.
تحفيز الطفل نفسياً:
قبل المذاكرة، خليه يسمع كلمات تشجيعية منك، قولي له إنك واثقة في قدراته وإنه يقدر ينجح.
خطوة عملية:
حضري الفطار قبل ما طفلك يصحى يذاكر وابدأي اليوم بانك تتكلمي معاه عن ايه هيعمله انهارده او عايز ينجزه في المذاكرة لان ده هيكون دافع انه يحسسه بالراحة.
2. كيف أنظم وقت طفلي للدراسة؟
فترات قصيرة للمذاكرة:
الأفضل إن وقت المذاكرة يكون مقسم إلى 30-50 دقيقة متواصلة، بعدها استراحة قصيرة، لان ده بيمنع الشعور بالإرهاق وبيحافظ على التركيز.
أوقات استراحة فعالة:
خلال الاستراحة، شجعي طفلك على الحركة أو يعمل حاجة بسيطة يحبها زي الرسم أو اللعب بلعبة صغيرة، لكن بلاش يتفرج على التلفزيون أو يستخدم الموبايل عشان ما يتشتتش.
خطوة عملية:
اعملي جدول يومي يحتوي على ساعات محددة للمذاكرة، مع فترات استراحة واضحة. ممكن تلوني الجدول بألوان مبهجة لجذب انتباه الطفل.
3. تخصيص وقت للمراجعة اليومية
المراجعة اليومية قبل النوم مهمة جدًا لتثبيت المعلومات.
المراجعة الخفيفة:
ركزي على النقاط الأساسية والأسئلة المهمة بدل ما تعيدي شرح كل الدرس.
التكرار الفعّال:
شجعي طفلك إنه يقرأ المعلومة أكتر من مرة أو يكتبها بخط إيده، لأن ده بيساعده على الحفظ.
خطوة عملية:
حددي وقت ثابت قبل النوم للمراجعة، وخلي الجو هادي علشان الطفل يركز أكتر.
4. تهيئة مكان الدراسة
مكان مريح ومنظم:
جهزي مكان هادي بعيد عن الضوضاء والإلهاء، وزودي الأدوات اللي ممكن يحتاجها زي الأقلام، الكراسات، والحاسبة.
إضاءة جيدة:
اتأكدي إن مكان المذاكرة فيه إضاءة كافية علشان عينيه ما تتعبش.
خطوة عملية:
ساعدي طفلك في ترتيب مكتبه قبل الامتحانات، وخلي أدواته كلها متاحة وسهلة الوصول.
5. ما هو الغذاء الصحي اثناء فترة الامتحانات ؟
وجبات خفيفة مليانة طاقة:
قدمي لطفلك أكلات زي الفواكه، المكسرات، الزبادي بالعسل، أو عصير فريش خلال فترات الاستراحة. ده بيديله طاقة بدون ما يسبب خمول.
شرب الماء بكثرة:
حافظي على ترطيب جسمه بشرب كميات كافية من الماء طول اليوم.
خطوة عملية:
جهزي بوكس صغير فيه سناكس صحية في متناول ايده عشان ميضطرش يوقف المذاكرة كتير.
6. النوم الكافي والراحة
تنظيم وقت النوم:
خلي طفلك ينام 8 ساعات على الأقل عشان يكون في كامل نشاطه وتركيزه، السهر للمذاكرة بيقلل من كفاءة التحصيل، مش بيزودها.
الاسترخاء قبل النوم:
ساعديه ينام بهدوء من خلال قراءة قصة قصيرة أو الحديث معه عن شيء إيجابي.
خطوة عملية:
ثبتي مواعيد النوم والصحيان قبل بداية فترة الامتحانات بأسبوع، علشان جسمه يتعود على الروتين الجديد.
7. دعم الطفل نفسياً
تفادي التوتر:
ما تضغطيش عليه أو تعاتبيه لو حسيتي إنه مش بيذاكر بالقدر الكافي، بدل كده، اسأليه لو كان محتاج مساعدة أو عنده مشكلة في مادة معينة.
الكلمات الإيجابية:
كلمات زي “أنا فخورة بيك”، “أنت شاطر”، أو “بكرة هتنجح وهتفرحنا” لأنها بتعمل فرق كبير في نفسية الطفل.
خطوة عملية:
خصصي وقت يومي للتحدث معه عن مخاوفه أو أي مشاكل بيواجهها في المذاكرة، وحاولي تطمني قلبه.
8. كيفية تنظيم وقت الطفل بين الدراسة والمرح
وقت للاسترخاء:
بعد ما يخلص الطفل مذاكرته اليومية، اديله وقت يعمل حاجة بيحبها، زي مشاهدة كارتون، اللعب، أو حتى المشي في الحديقة.
التوازن مهم:
خلي يومه متوازن بين المذاكرة واللعب، علشان ما يحسش بالضغط المستمر اثناء فترة الامتحانات .
خطوة عملية:
اعملي قائمة بالأنشطة اللي يحبها طفلك وخليها مكافأة لإنجاز المهام اليومية.
تنظيم يوم طفلك خلال فترة الامتحانات هو مسؤوليتك كأم، لكن مهم كمان تشاركيه في تحديد الأولويات ووضع الجدول. خلي هدفك الأساسي هو دعمه نفسيًا وتنظيم وقته بشكل يوازن بين المذاكرة والراحة. بالاهتمام والصبر، طفلك هيقدر يتخطى فترة الامتحانات بنجاح وهدوء.
اقري عن : إزاي تتعاملي مع طفلك لو مش عايز يذاكر؟
