ابني بيزهق بسرعة في الإجازة.. أعمل إيه؟
ابني بيزهق بسرعة في الإجازة.. أعمل إيه؟
الطفل يبقى لسه صاحي من النوم وفجأة يقول إنه زهقان ومش عارف يعمل إيه.
الزهق مش بس مشكلة عند الأطفال لكنه بقى شيء بيخلي يومهم ممل، وبيخلي الأمهات والأبهات يحسوا إنهم مش عارفين يسعدوا ولادهم أو يملوا وقتهم بحاجة مفيدة.
لكن الحقيقة إن الزهق له أسباب وله حلول كمان، ومن خلال فهمنا للطفل وطريقة تفكيره، نقدر نعدّي الإجازة دي من غير صراخ ولا شاشات طول الوقت ولا إحساس بالملل.
ليه الطفل بيزهق بسرعة في الإجازة؟
1. لأنه متعود على روتين المدرسة
طول السنة الدراسية، الطفل بيكون عنده جدول واضح:
ساعة يصحى فيها، حصص، فسحة، واجب، نوم في ميعاد ثابت.
لكن في الإجازة، فجأة كل حاجة بتتغير :
“أعمل إيه دلوقتي؟”، “فين الناس اللي كنت بشوفهم؟”، “فين النشاط؟”.
2. لأن عنده طاقة كبيرة مش عارف يفرغها
الأطفال بطبعهم بيحبوا الحركة والتجربة لو قعدوا فترات طويلة في البيت من غير خروج أو حركة لازم هيحسوا بالزهق.
3. لأنه مش بيلاقي حاجة تثير فضوله
الطفل بطبعه فضولي لو مافيش أنشطة بتخليه يستكشف أو يتحدى نفسه بيحس بالملل بسرعة حتى لو حواليه ألعاب كتير.
4. لأن الروتين اليومي كله شبه بعضه
كل يوم شبه اللي قبله: نفس الأكل نفس القعدة نفس اللعب فبيبدأ يحس إن مافيش حاجة جديدة تستحق يتحمس ليها.
طب أتعامل إزاي مع الزهق ده؟
1. اعرفي إمتى طفلك بيزهق ومينفعش تتجاهليه
الزهق مش دايما حاجة وحشة، أوقات بيكون فرصة إنه يبدع أو يخترع حاجة.
لكن لو اتكرر كتير وبقى بيوصل للعصبية بسهولة أو العياط أو الإدمان على الشاشات، لازم تتدخلي.
ابدئي تسأليه:
“تحب تعمل إيه دلوقتي؟”
“إيه أكتر حاجة نفسك تلعبها؟”
“لو معاك عصاية سحرية، كنت هتعمل إيه؟”
الأسئلة دي هتخليه يعبر عن نفسه، ويمكن تديكي خيوط لفهم إيه اللي ناقصه.
2. اعملي جدول بسيط ليومه
مش لازم جدول عسكري، لكن ترتيب بسيط لليوم بيخليه يحس إن في حاجة يترقبها مثلا:
الصبح: نشاط جسدي (لعب، مشي، تمارين بسيطة)
الظهر: وقت حر للعب أو التلوين
بعد الغدا: نشاط مشترك مع ماما (طبخ، قصة، لعبة جديدة)
العصر: وقت شاشة (محدود)
قبل النوم: حكاية أو لعبة هادية
لان الجدول بيقلل الملل وبيخلي اليوم متنوع.
3. وفري أنشطة غير تقليدية
مش لازم ألعاب غالية الحاجات البسيطة أوقات بتكون ممتعة أكتر، خصوصا لو فيها إبداع أو مشاركة.
افكار لأنشطة تكسر الزهق:
صندوق المفاجآت: كل يوم يحط فيه نشاط بسيط ويختاره عشوائيا.
صناعة لعبة من الكرتون: لعبة صيد سمك، بيت صغير، أو متاهة.
لعبة البحث عن الكنز: خبي له حاجات في البيت وسيبيه يدور عليها بتلميحات.
تحدي ١٠ دقايق: مين يلم لعبه أسرع؟ مين يرسم أسرع خروف؟
أشغال يدوية: قص ولزق، رسم، تشكيل صلصال، خرز.
الحاجات دي بتخلق جو تفاعلي، وتشجع الطفل على التفكير بدل ما يستسلم للزهق.
4. شاركيه اللعب
الطفل بيزهق لما يكون لوحده، حتى لو عنده ١٠٠ لعبة.
بس لما تلعبي معاه أو تشاركيه اللعبة الموضوع بيتحول من وقت فراغ لوقت مميز.
جربي تلعبي معاه مرة في اليوم بس حتى لو ١٠ دقايق.
مش مهم تكوني شاطرة، المهم إنك بتشاركيه وتضحكي معاه.
5. قولي له “الزهق مش عيب”
أوقات الطفل بيحس إنه بيضايقك بكلمة “زهقان”، فبيحاول يخفيها أو يخرجها على شكل غضب.
قولي له بهدوء: أنا كمان ساعات بزهق، وده طبيعي. تعالى نشوف نعمل إيه حلو مع بعض؟
لما تحترمي مشاعره، هيبدأ هو كمان يحترمها ويعبر عنها بهدوء.
🚫 حاجات ماينفعش تعتمدي عليها طول الوقت
الشاشات كحل دايم
الموبايل أو التابلت مش حل للزهق، هو مجرد تسكين. بعد شوية هيرجع يزهق تاني، ويمكن أسوأ.
اللعب لوحده دايما
العزلة مش دايما صحية. الطفل محتاج يختلط، يتحرك، يضحك مع ناس.
ردود زي: “إزاي زهقان وانت عندك كل الألعاب دي؟”
الطفل مش بيقيس الزهق بالكم، هو بيقيسه بالإثارة والاهتمام. ممكن يبقى عنده ١٠٠ لعبة، بس هو محتاج تواصل أكتر من أي حاجة.
في النهاية
الزهق مش عدو، هو نداء من الطفل بيقولك:
“أنا محتاج أتحرك، أكتشف، أغيّر، أتعلم، أو حتى أتكلم معاكي.”
وإنت مش محتاجة تملي له يومه لحظة بلحظة لكن محتاجة تكوني جنبه، تفهميه وتوفري له بيئة فيها تنوع حب، وتواصل.
الإجازة ممكن تبقى أجمل أيام حياته… وممكن تبقى أكتر أيام ملل لو ما اتدخلناش.
بس بخطوات بسيطة، وفهم حقيقي، تقدري تحوّلي الزهق لفرصة يبدع فيها ويستمتع بطفولته من غير ما يعتمد على الشاشات ولا يزهق كل ٥ دقايق.
اقري عن : ابني عايز موبايل طول اليوم ازاي اقلل من استخدامه بدون ما يزهق ؟
