ابني عايز موبايل طول اليوم ازاي اقلل من استخدامه بدون ما يزهق ؟
ابني عايز موبايل طول اليوم ازاي اقلل من استخدامه بدون ما يزهق ؟
في اجازة الصيف بنلاحظ حاجة بتتكرر في بيوت كتير وهي ان الطفل ماسك الموبايل من أول ما يصحى لحد ما ينام وأي محاولة انك تبعديه عن الموبايل بتتحول لنوبة غضب
وده بيخليكي محتارة هل أخد منه الموبايل نهائي؟ ولا أسمحله شوية؟
وإزاي أسيطر على الموضوع من غير صُريخ وخناق؟
في المقال ده، هنتكلم عن ليه الأطفال بيتشدوا للموبايل، وإزاي نقدر نرجع التوازن لحياتهم من غير ما نحرمهم ولا نفسدهم.
ليه الأطفال بيطلبوا الموبايل طول اليوم؟
1. الموبايل سهل ومسلي
الألعاب والفيديوهات مصممة تشد انتباه الطفل وتدّيه متعة فورية.
كل ما بيكسب اكتر بيلاقي صوت أو صورة أو مكافأة وده بيخلي دماغه تتعوّد على نوع من المتعة السريعة اللي مش بتتوفر بسهولة في اللعب العادي.
2. فراغ كبير من غير بدائل
لو الطفل فاضي ومش لاقي أنشطة أو اهتمام، طبيعي يلجأ للموبايل لأنه الحل الأسرع.
خصوصا في الإجازة، لما يقل التواصل أو اللعب مع الأهل.
3. هو شايف الكبار بيعملوا كده
الطفل بيتعلم مننا. لو شافنا دايمًا على الموبايل طبيعي يقلد.
لو إحنا قاعدين بنقلب في السوشيال ميديا طول اليوم، صعب نطلب منه يسيبه.
4. الموبايل وسيلة هروب
أحيانا الطفل بيلجأ للموبايل علشان يهرب من زعل، أو ملل أو إحساس بالوحدة.
وده بيخلي التعلق بيه مش بس عادة، لكن كأنه وسيلة أمان.
اتعامل إزاي مع التعلق ده؟
1. اتكلمي معاه من غير لوم
قبل ما تمنعي أو تحرمي، اسأليه:
“إيه أكتر حاجة بتحبها في الموبايل؟”
“تحب تستخدمه إمتى؟ وإزاي؟”
لما تتكلمي معاه هتحسي إن فيه سبب ورا سلوكه، وسهل وقتها تلاقي حل يناسبه.
2. اعملي “اتفاق” مش “أمر”
بدل ما تقولي له: “مش هتمسك الموبايل غير ساعة”، اتفقي معاه على قواعد مشتركة، زي: ساعة واحدة في اليوم او بعد ما نخلص نشاط معين مفيش موبايل على الأكل أو قبل النوم
لأن الاتفاق بيخليه يحس إنه شارك، مش إنك فرضتي عليه نظام غصب.
3. قدمي بدائل حقيقية
ما ينفعش تقولي له “سيب الموبايل” من غير ما يكون في حاجة تانية يعملها.
جربي: ألعاب بتتركب وتتفك او نشاط حركي في البيت او خروجه بسيطة او أشغال يدوية
لان الطفل مش هيزهق من الموبايل لو لقى حاجة تانية ممتعة بجد.
4. خلي الموبايل “آخر اختيار” مش “أول حل”
لو طلبه في أول اليوم قوليله:
“لما نخلص لعبنا ووقتنا سوا ساعتها تاخد وقتك على الموبايل.”
الهدف إن الموبايل يبقى جزء صغير من يومه، مش الأساس.
5. خليكي قدوة
ابنك بيتعلم منك لو شافك طول الوقت مشغولة بالموبايل هيقنع نفسه إن ده طبيعي.
حاولي يكون فيه وقت في اليوم كل العيلة تسيب الموبايلات وتتفاعل مع بعض.
امتى أبدأ أقلق؟
لو لاحظتي إن :
- ابنك عصبي جدًا لما يتمنع من الموبايل
- بدأ ينسحب من اللعب أو التواصل
- بيقضي ساعات طويلة قدامه
- بقى بيكذب علشان يستخدمه
ساعتها محتاجين تدخل حاسم وتنظيم أكتر، ولو استمر الوضع ممكن تحتاجي استشارة تربوية.
في النهاية الموبايل مش عدو، لكنه أداة لو استخدمناه صح، هيكون وسيلة تعليم وترفيه مفيدة.
لكن لو سبناه يسيطر على يوم الطفل، هيأثر على تفكيره، ومشاعره، وطريقته في التفاعل مع الحياة.
أنتي مش محتاجة تمنعيه، أنتِ بس محتاجة “توازني” استخدامه.
كل ما ابنك يحس إن في بدائل، وفي حب، وفي وقت بيتقضى معاه، هيرجع الموبايل لحجمه الطبيعي في حياته.
