الخوف عند الاطفال ظاهرة طبيعية بيمر بيها كل انسان طول حياته باشكال وفي مواقف مختلفة
لكن لما بيكون الخوف غير طبيعي لما بيستمر فترة طويلة مع طفلك لنفس السبب او الخوف بيستمر لفترة حتى لو لاسباب مختلفة
الخوف عند الاطفال وأسبابه :
1 . قبل ما تراقبي طفلك راقبي نفسك في البداية
لو انتي بتحسي دايما بتوتر وضربات قلبك سريعة بسبب الضغوط حتى لو مش بتتكلمي عنها قدام طفلك
الخوف والتوتر بيتنقل لطفلك لان زي ما انتي بتحسي بيه منغير ما يتكلم هو بيحس بيكي منغير ما تتكلمي
2 . مخاوف بسبب معاملة الاب او الام
1 . الشدة والحزم طول الوقت والعقاب الشديد على الاخطاء بشكل مستمر
2 . اهانة الطفل في البيت او في المدرسة بيخلي جواه دايما خوف من التعرض للاهانة وخوف بشكل عام لانه بيفقد ثقته بنفسه فمع اي موقف بيتوتر بشكل كبير
3 . لو بتقدمي لطفلك حب مشروط بالنجاح في المدرسة وقتها هيفتقد طفلك احساس الامان والاحتواء جوا البيت وهيحس انه مش محبوب كفاية
4 . لو انتي الام او اي فرد كبير فالعيلة بتبالغوا في الخوف من شئ معين زي الحشرات او الحيوانات
5 . الخوف المستمر على طفلك وتكرار كلمة ( انا خايفة عليك ) ممكن تفقد الطفل ثقته بنفسه
6 . مشاهدة المحتوى العنيف لمشاهد حوادث او كوارث طبيعية
7 . مشاكل الاب والام بشكل مستمر والخناق قدام طفلك بتحسسه انه ممكن يتساب في اي وقت وانه هيكون لوحده وده نوع من الصدمات العنيفة للاطفال.
8 . وارد يكون خوف طفلك نابع من جواه من فكرة ملحة بتيجي في باله باستمرار وبتكون فكرة خيالية
كل الاسباب دي هتخلي طفلك يخاف من اي شئ والخوف مش هيبقى في الطفولة بس حتى لو مبقاش بيخاف بنفس الدرجة لما يكبر لكن بتزرع جواه عقد نفسية مستمرة معاه طول حياته
ازاي تفرقي بين الفوبيا وبين الخوف العادي ؟
- الخوف العادي ممكن ينتهي لو موجودة جمبه زي ما بيقولك بطمن لما بنام جمبك
- لكن الفوبيا حاجه بيشوفها بتخوفه حتى في وجودك بيفضل خايف وفي نفس حالة الذعر
ازاى اقلل من خوف طفلي ؟
- اعرفي ايه هي مخاوف طفلك وخليه يعبر عنها بوضوح واسمعيه باهتمام لان التقليل او التسخيف من المخاوف مش حل ( خدي الامر على محمل الجد )
- اصبري على طفلك لان الخوف مش هيروح في يوم وليلة لان الخوف عند الاطفال بيكون اقوى من خوفنا
- قربي من طفلك وهو بيحاول يتجاوز الخوف يعني حاولي تعرضيه لمصدر خوفه بالتدريج مثلا
- لو طفلك بيخاف من دخول الحمام وعايزك تدخلي معاه قوليله هنجرب ابقى معاك بس هستناك برا لكن متخافش انا هبقى سمعاك لو لقيت اي حاجه بتخوف انا هاجي فورا
- وبعدين قوليله انا هبعد اكتر هروح اوضة تانية وهكون سمعاك وهكون فلحظة قدامك لو لقيت حاجه بتخوف وهكذا لحد لما يتعود يكون لوحده تماما
- اتجنبي تماما ان تحكي او حد يحكي قدام طفلك عن الخرافات زي العفاريت او يحكي عن الافلام المرعبة او ان طفلك يتفرج عليها حتى لو مرعبة بشكل خفيف بنسبالك
- اتجنبي تماما كلام زي انت راجل مينفعش تخاف او تعاقبيه بسبب انه خايف طول الوقت لان ده مش هيحل مشكلة الخوف هو هيسببله مشكلة اكبر في المستقبل
الخوف عند الاطفال وانواعه ؟
الخوف نوعين وهم :
- خوف فطري .
- خوف مكتسب .
الخوف الفطري :
- هو الخوف الطبيعي الي جوا كل انسان من المخاطر زي الحيوانات المفترسة وبيختفي الخوف بمجرد ما يختفي سبب الخوف.
الخوف المكتسب :
- هو الخوف الي بقى كأنه سلوك جديد على طفلك بسبب موقف تعرض ليه واثر عليه
- زي لو طفلك شاف فيلم رعب عن العرايس المرعبة بعدها يخاف من اي عروسة او دبدوب
- او لو الطفل شاف منظر صادم زي حادث في الطريق فيكون خايف يمشي لوحده
امتى اعرف ان خوف طفلى محتاج تدخل طبيب ؟
- لو لقيتي ان خوف طفلك مأثر عليه وبيمنعه يمارس حياته بشكل طبيعي زي باقي الاطفال
- او مسببله اعراض جسدية قوية زي ضربات القلب السريعة ( البانيك ) او الدوخة وغيرها من الاعراض او اضطرابات النوم القوية
- كل دى حاجات لو لاحظتي وجودها على طفلك يبقى لازم تستشيرى طبيب متخصص فى اسرع وقت .
اقري كمان عن : طفل ال ADHD وطريقة التعامل معه
