ابني بيتعصب بسرعة… اتعامل معاه ازاي؟
واحدة من أكتر المشاكل اللي بتقابل الأمهات هي إن ابنهم بيتنرفز بسرعة، وبيبقى رد فعله عنيف على حاجات ممكن تكون بسيطة جدًا. ممكن يتعصب علشان لعبة ما اشتغلتش، أو يزعق لمجرد إنك رفضت طلب ليه، أو حتى يعند ويدخل في نوبة بكاء أو غضب علشان حاجة تافهة.
اللي بيصعب المشكلة أكتر إن الأهل ساعات بيبقوا مش فاهمين هو ليه بيتصرف كده، ومش عارفين يتعاملوا معاه إزاي، خصوصا لما يكون الطفل عنيد أو حساس زيادة.
في المقال ده هنتكلم عن أسباب العصبية عند الأطفال، وإزاي نحتويها بشكل تربوي، وهنقدم خطوات عملية تساعدك تهدي ابنك وتعلميه إزاي يعبّر عن مشاعره بشكل سليم بدل العصبية.
ليه الطفل بيتنرفز بسرعة؟
فيه أطفال بطبيعتهم حساسيتهم عالية، وبيتأثروا بسرعة بأي حاجة حواليهم. لكن كمان، العصبية ساعات بتكون ناتجة عن حاجات بسيطة إحنا الكبار مش بناخد بالنا منها، زي:
1. ما بيعرفش يعبّر عن نفسه
الطفل ساعات بيبقى جواه مشاعر كتير: زعل، إحباط، غيره، أو حتى حيرة، بس مش بيعرف يقولها. لأنه لسه بيتعلم يعبر بالكلام، فالمشاعر دي بتطلع على هيئة غضب أو صريخ أو حتى ضرب. هو مش ناوي يزعلك، هو بس مش عارف يقولك "أنا زعلان" أو "أنا محتاج حضنك". وكل ما كانت حصيلته اللغوية ضعيفة، كل ما العصبية كانت أعلى.
2. الضغط والتعب بيأثروا على مزاجه
الطفل اللي ما نامش كويس، أو جعان، أو مضغوط من المدرسة أو من التزامات كتير، بيكون قابل للاستفزاز والانفعال بسهولة جدًا.
3. حاسس إن محدش بيسمعه
أوقات الطفل بيتكلم ويشتكي ويحاول يعبّر عن اللي جواه، بس ما حدش بيسمعه بجد. في الحالة دي، هو بيتعلم إن الطريقة الوحيدة اللي تخلي اللي حواليه ياخدوه بجد هي العصبية أو العياط أو الزعيق.
4. بيشوف توتر حواليه
الطفل بيتعلم من البيئة اللي حواليه. لو البيت فيه دايمًا صوت عالي، أو الأب والأم بيتخانقوا، أو في توتر مستمر، ده بينعكس على سلوك الطفل.
اتعامل مع عصبيته إزاي؟
التعامل مع طفل عصبي محتاج صبر وهدوء وفهم. مش كفاية تقولي له "ما تعيطش" أو "اسكت"، لأن دي ردود بتكبّت مشاعره من غير ما تعلّمه يتصرف إزاي.
1. افهمي سبب العصبية قبل أي رد فعل
حاولي تدخلي جوا دماغ ابنك، وتفكري: "هو مضايق ليه؟" هل اتظلم؟ حاسس بالغيرة؟ جعان؟ زهقان؟ المعرفة دي بتساعدك تردّي رد مناسب بدل ما تاخدي الموضوع بشكل شخصي أو تزعقي.
2. اهدي الأول علشان هو يهدى
الطفل العصبي محتاج قدامه حد ثابت وهادي، مش حد بيزعق زيه.
مثلاً بدل ما تقولي: "إنت بتزعق ليه؟ اسكت بقى!" جربي تقولي له: "أنا شايفة إنك متضايق.. تعال نهدى ونفكر سوا."
3. علميه يسمي مشاعره
الأطفال اللي بيتعلموا يقولوا "أنا زعلان"، أو "أنا متضايق علشان كذا"، بيقلّ عندهم السلوك العصبي. يعني لما يزعق، بدل ما تقولي له "عيب"، قولي له: "تحب تحكيلي إيه اللي ضايقك؟ تحب تقوللي حاسس بإيه؟"
4. ما تسيبيش السلوك الغلط يعدي من غير توجيه
التعاطف مش معناه تسيبي الطفل يضرب أو يكسر أو يزعق من غير حساب. مهم توصلي له إنك فاهماه، بس كمان في حدود لازم يحترمها.
5. علميه مهارات التهدئة
- يعد من 1 لـ 10
- ياخد نفس عميق
- يرسم مشاعره على ورقة
- يقعد لوحده في مكان هادي
- يشيل لعبة بيحبها لما يضايق
6. كافئي السلوك الإيجابي لما يحصل
لما ابنك يقرر يتكلم بدل ما يزعق، أو يهدى بنفسه من غير ما يضرب، امدحيه على ده. مش لازم مكافأة مادية، ممكن كلمة حلوة أو حضن.
امتى ألجأ لمتخصص؟
لو العصبية أكتر من الطبيعي وبتأثر على حياة الطفل اليومية، لازم دعم من متخصص نفسي للأطفال، خصوصا لو:
- العصبية مستمرة ومبالغ فيها طول الوقت
- الطفل يرفض يسمع أي كلام
- السلوك فيه ضرر لنفسه أو لغيره
- تراجع دراسي أو انعزال عن أصحابه
عصبية الطفل مش دايمًا معناها إنك فشلتي في تربيته، وأوقات كتير بتكون مجرد طريقة للتعبير عن مشاعر مش قادر يشرحها.
خدي نفس، وافتكري إن ورا كل نرفزة في طفل صغير بيقولك: "أنا محتاجك تفهميني.. مش تزعقيلي."
اقري عن: ابني مش بيحب يذاكر… أزعق؟ أسيبه؟ ولا أعمل إيه؟
