تنمية قدرات طفلك العقلية باستخدام لعبة صندوق البريد
● مرحلة قبل الحضانة بيكون طفلك لسه معندوش القدرة إنه يركز لفترة طويلة في شيء واحد. لذلك لازم يكون تركيزك بأنك مش بس تعلميه، لكن كمان تحسني قدراته العقلية.
هتتعلمي من خلال المقال ده ازاي ممكن تنفذي ده من خلال لعبة صندوق البريد. اللعبة ليها وظيفة أساسية وهي أن الطفل بيطابق صورة الكارت الصغير مع المسطرة الكبيرة. لكن مطابقة الصور فقط مش هتعلمه اسم كل كارت ولا هتنمي قدراته العقلية زي التركيز والذاكرة، ولا مهاراته في التصنيف ووصف الصور بجمل صحيحة.
انهارده هتتعرفي على أكثر من نشاط تنفذيه مع طفلك يحسن من قدراته ومهاراته بالدمج بين التعليم وتنمية المهارات واللعب.
1. التصنيف:
في النشاط ده هتعلمي طفلك أن يكون في عقله خريطة ذهنية يعرف منها تصنيف كل حاجة حواليه، زي الفرق بين الخضار والفاكهة وبين الحيوانات المفترسة والأليفة.
- اختاري مثلا 4 كروت مختلفة (خيار، جزر، فلفل، تفاحة) واسألي طفلك أيه هو العنصر اللي مش بينتمي لباقي المجموعة. وبكده هتكوني طورتي من تركيز طفلك وقدرته على التصنيف.
- أو تدمجي كروت صنفين من الصور وتطلبي من طفلك يقسم كل صنف لوحده، مثلا يكون قدامه كروت الفاكهة والخضار ويصنف كل نوع لوحده.
وبالأنشطة دي، هيكون طفلك قدر يربط بين صورة الكارت والاسم والتصنيف.
2. الذاكرة:
عشان طفلك مينساش أسماء الكروت اللي اتعلمها بسبب تأثير الشاشات، لازم تدربيه على أسماء الكروت بطريقة تنشط ذاكرته بشكل مستمر.
- اختاري 3 كروت بشكل عشوائي يشوفهم طفلك، وتقلبيهم، وتسأليه عن ترتيبهم كان إيه من اليمين للشمال ومن الشمال لليمين.
- بعد ما ينجح في كل مرة، هتزودي من عدد الكروت تدريجياً.
3. الوصف:
عشان تنمي مفاهيم طفلك وتحسني قدرته على الوصف والكلام، لازم يتمكن من أنه يفرق بين أنواع الفاكهة أو الحيوانات حسب اللون والشكل والحجم ويوصفهم بشكل صحيح.
- اختاري كارت بشكل عشوائي من مجموعة الحيوانات، الفاكهة، الخضار أو الطيور، واسألي طفلك: "إيه هو اسم الحيوان؟ فين بيعيش؟ بياكل إيه؟".
- بالنسبة لكروت الفاكهة والخضار: "إيه اسم الصورة؟ لونها إيه؟ حجمها كبير ولا صغير؟".
وبعد الأنشطة دي كلها، هيكون طفلك اتعلم أسماء كل الكروت بأكثر من طريقة وكمان طورتي مهاراته العقلية بطريقة سهلة وممتعة.
