"ماما أنا زعلان!".. ازاي تتفهمي مشاعر طفلك وتتعاملي معها بطريقة صحيحة
كتير من الأمهات بيمروا بنفس المشكلة انها مش عارفه تتعامل مع طفلها بطريقة صحيحة خاصة مع نوبات الغضب. لكن في طرق بسيطة وفعالة للتواصل مع طفلك وفهم مشاعره لتبني علاقة قوية وسعيدة مع طفلك.
ليه بتحصل نوبات الغضب؟
الأطفال زي الكبار بيحسوا بالمشاعر مثل الغضب، الحزن، الفرح، الخوف… كل المشاعر جزء طبيعي من تطورهم ونموهم.
لكن المشكلة في أنهم معندهمش طرق كفاية تساعدهم يعبروا عن المشاعر دي بطريقة صح، فبيلجأ عقلهم للتعبير عنها من خلال الصريخ والعياط ونوبات الغضب. وحتى لو كان طفلك في سن صغير، في حالة التعامل الغلط مع نوبات الغضب، طفلك هيتأثر بطريقة سلبية.
أخطاء شائعة ترتكبها الأمهات:
- تجاهل المشاعر: لما يبدأ طفلك يعيط، تحسي انك عايزاه يسكت بسرعة فتتجاهلي سبب عياطه وده بيحسسه بأن مشاعره مش مهمة.
- الصراخ والتهديد: أحيانًا بسبب الضغوط ممكن تتعصبي أو تزعقي له أو تهدديه بالعقاب المبالغ فيه. الطريقة دي ممكن تزيد الأمور سوء وتخلي طفلك يحس بالخوف وعدم الأمان.
- المقارنة: مقارنة طفلك بأطفال غيره بيحسسه بالدونية ويقلل من ثقته بنفسه.
كيف اتعامل مع نوبات الغضب بطريقة صحيحة؟
الهدوء أولا:
لما يبدأ طفلك يعيط أو يصرخ، حاولي تحافظي على هدوئك لان العصبية من الطرفين هتخلي الموقف أصعب، وحاولي تفهمي اللي حاسس بيه.
الاستماع الفعال:
اقعدي جمب طفلك وبصليه في عينيه، اسمعيه بهدوء وانتبهى لكلامه حتى لو كان بيتكلم بلغة مش مفهومة، لان الطريقة دي تحسسه انك مهتمة بيه ومشاعره مهمة.
تسمية المشاعر:
ساعدي طفلك على تسمية مشاعره، قولي له: "أنا حاسة بيك أنك غضبان مجبتش اللعبة الي نفسك فيها". الطريقة هتساعد طفلك على فهم مشاعره والتعبير عنها والتعامل معاها بشكل أفضل.
تحويل الانتباه:
لو طفلك متضايق بسبب رفضك لطلب منه، حاولي تحويل انتباهه لحاجة تانية ممتعة زي قراءة القصص أو اللعب معاه لعبة بسيطة.
الاحتضان:
حضنك لطفلك بيحسسه بالأمان والحب ويساعده على تهدئة نفسه.
افتكري دايمًا أنتي أفضل أم لطفلك وكل اللي محتاجاه هو الصبر والحب والفهم.
